വിദ്യാര്‍ഥികള്‍ക്ക് നിരോധിത ലഹരി വസ്തുക്കള്‍ വിറ്റ കെ.എസ്.ഇ.ബി ജീവനക്കാരനെ പൊലീസ് അറസ്റ്റ് ചെയ്തു.
വിദ്യാര്‍ഥികള്‍ക്ക് നിരോധിത ലഹരി വസ്തുക്കള്‍ വിറ്റ കെ.എസ്.ഇ.ബി ജീവനക്കാരനെ പൊലീസ് അറസ്റ്റ് ചെയ്തു. തേവലക്കര പുത്തന്‍സങ്കേതം ചുനക്കാട്ട് വയല്‍ വീട്ടില്‍ നവാസ് (36) ആണ് പിടിയിലായത്. കെ.എസ്.ഇ.ബിയില്‍ ലൈന്‍മാനാണ് നവാസ്. സ്കൂള്‍ മേഖല കേന്ദ്രീകരിച്ച്‌ എട്ട്, ഒമ്ബത്, പത്ത് ക്ലാസുകളിലെ വിദ്യാര്‍ഥികള്‍ നിരോധിത ലഹരിവസ്തുകള്‍ ഉപയോഗിക്കുന്നതായി പൊലീസിന് ലഭിച്ച വിവരത്തെ തുടര്‍ന്നായിരുന്നു പരിശോധന.
തേവലക്കര കോയിവിള അയ്യന്‍കോയിക്കല്‍ മേഖലയിലെ സ്കൂള്‍, സ്വകാര്യ വിദ്യാഭ്യാസ സ്ഥാപനങ്ങള്‍ എന്നിവിടങ്ങളിലെ വിദ്യാര്‍ഥികളെ കേന്ദ്രീകരിച്ചാണ് ഇയാള്‍ ലഹരി വസ്തുക്കള്‍ വിറ്റിരുന്നത്. വിദ്യാര്‍ഥികളുടെ കൈവശം കണ്ട ലഹരി വസ്തുക്കളെ കുറിച്ച്‌ വിദ്യാഭ്യാസ -സ്ഥാപനാധികാരികളുടെ സഹായത്തോടെ വിവരം ശേഖരിച്ച ഡാന്‍സാഫ് ടീം നടത്തിയ രഹസ്യ നീക്കത്തിനൊടുവില്‍ 120 പാക്കറ്റ് ലഹരിവസ്തുക്കളുമായി പ്രതിയെ പിടികൂടുകയായിരുന്നു.
ഇയാള്‍ക്കെതിരെ ജുവനൈല്‍ ജസ്റ്റിസ് ആക്‌ട് പ്രകാരവും കോട്പാ ആക്‌ട് പ്രകാരവും തെക്കുംഭാഗം പൊലീസ് കേസെടുത്തു. തെക്കുംഭാഗം എസ്.ഐ സുജാതന്‍പിള്ള, ഡാന്‍സാഫ് ടീം അംഗങ്ങളായ എസ്.ഐ ആര്‍. ജയകുമാര്‍, എ.എസ്.ഐ ബൈജു ജെറോം, എസ്.സി.പി.ഒ സജു എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. പ്രതിയെ കോടതിയില്‍ ഹാജരാക്കി.
വാർത്തകൾ വേഗത്തിൽ അറിയാനും, അറിയിക്കാനും ഈ ഗ്രൂപ്പിൽ JOIN ചെയ്യുക
