മലപ്പുറം: വ്യാപാരസ്ഥാപനത്തില്‍ നിന്ന് അടയ്ക്കാ മോഷണം നടത്തിയ സംഭവത്തില്‍ രണ്ടുപേരെ ചങ്ങരംകുളം പൊലീസ് പിടികൂടി.
വയനാട് സുല്‍ത്താന്‍ ബത്തേരി നായക്കന്‍ പറമ്ബത്ത് കെ ബഷീര്‍ (48), മലപ്പുറം വട്ടല്ലൂര്‍ പുളിയങ്കോട് അബ്ദുള്‍ ലത്തീഫ് (30) എന്നിവരെയാണ് അറസ്റ്റ് ചെയ്തത്.
മോഷ്ടിച്ച അടയ്ക്ക വില്‍ക്കാനെത്തിയപ്പോള്‍ പ്രതികളെ കണ്ട് വ്യാപാരിക്ക് സംശയം തോന്നി. പണം വാങ്ങാന്‍ പിന്നീട് വരാന്‍ പറഞ്ഞു. പണത്തിനായി പിന്നീട് വന്നത് പൊലീസ് വലയത്തിലേക്കായിരുന്നു. കഴിഞ്ഞ ഞായറാഴ്ച പെരുമുക്കിലെ അടയ്ക്ക വ്യാപാര സ്ഥാപനത്തില്‍നിന്ന് 17 ചാക്ക് അടയ്ക്ക മോഷണം പോയിരുന്നു. മോഷണ വിവരം അടയ്ക്കാ വ്യാപാരികളുടെ ഗ്രൂപ്പിലൂടെ ജില്ലയിലെ വിവിധ പ്രദേശങ്ങളിലേക്ക് അറിയിച്ചു. ഇതിനിടെ വ്യാപാരികള്‍ പോലീസില്‍ പരാതി നല്‍കിയിരുന്നു. മോഷ്ടാക്കളുടെ വാഹനത്തെക്കുറിച്ച്‌ വിവരം ലഭിച്ച പൊലീസ് അതുമായി അന്വേഷണം നടത്തുന്നതനിടെയാണ് പ്രതികള്‍ വലയിലായത്.
മലപ്പുറം മുണ്ടുപറമ്ബില്‍ വില്‍പ്പനയ്ക്ക് എത്തിയപ്പോള്‍ സംശയം തോന്നിയ കച്ചവടക്കാരന്‍ പണത്തിനായി പിന്നീട് വരാന്‍ ആവശ്യപ്പെടുകയും പൊലീസിനെ വിവരം നല്‍കുകയുമായിരുന്നു. ഉടന്‍ പോലീസെത്തി ഇവരെ പിടികൂടുകയും തൊണ്ടിമുതല്‍ കസ്റ്റഡിയില്‍ എടുക്കുകയും ചെയ്തു. തുടര്‍ന്ന് അടയ്ക്ക മോഷണം നടന്ന പെരുമുക്കില്‍ എത്തിച്ച്‌ തെളിവെടുപ്പ് നടത്തുകയും ചെയ്തു. സംഭവത്തില്‍ ഒരാള്‍ കൂടി പിടിയിലാകാനുണ്ടെന്നാണ് സൂചന. പ്രതികളെ പൊന്നാനി കോടതിയില്‍ ഹാജരാക്കി.
വാർത്തകൾ വേഗത്തിൽ അറിയാനും, അറിയിക്കാനും ഈ ഗ്രൂപ്പിൽ JOIN ചെയ്യുക
