പത്തനംതിട്ട : ട്യൂഷന്‍ കഴിഞ്ഞ് വീട്ടിലേക്ക് മടങ്ങാന്‍ ബസ് കാത്തു നില്‍ക്കവേ വഴിയരികില്‍ പാര്‍ക്ക് ചെയ്തിരുന്ന ബൈക്കില്‍ ചാരി നിന്നതിന് പ്ലസ് ടു വിദ്യാര്‍ത്ഥികളെ കുത്തി പരിക്കേല്‍പ്പിച്ചതായി പരാതി.
കുന്നന്താനം എന്‍എസ്‌എസ് ഹയര്‍ സെക്കന്‍ഡറി സ്കൂളിലെ വിദ്യാര്‍ത്ഥികളായ കുന്നന്താനം തെക്കേ ചാലുങ്കല്‍ വൈശാഖ്, കുന്നന്താനം കാലായില്‍ വീട്ടില്‍ എല്‍ബിന്‍ എന്നിവര്‍ക്കാണ് പരിക്കേറ്റത്. ബിഎസ്‌എന്‍എല്‍ ജീവനക്കാരനായ അഭിലാഷ് എന്നയാളാണ് അക്രമം നടത്തിയതെന്ന് പരാതിയില്‍ പറയുന്നു. ഇന്ന് രാവിലെ 11 മണിയോടെ കുന്നന്താനം ബിഎസ്‌എന്‍എല്‍ ഓഫീസിന് സമീപമായിരുന്നു സംഭവം.
ബസ് കാത്തുനിന്ന വിദ്യാര്‍ത്ഥികള്‍ റോഡരികില്‍ പാര്‍ക്ക് ചെയ്തിരുന്ന അഭിലാഷിന്റെ ബൈക്കില്‍ ചാരി നിന്നു. ഇതു കണ്ടു ഇവിടേക്ക് വന്ന അഭിലാഷ് വിദ്യാര്‍ത്ഥികളുമായി വാക്കുതര്‍ക്കത്തില്‍ ഏര്‍പ്പെട്ടു.പ്രകോപിതനായ അഭിലാഷ് ബിഎസ്‌എന്‍എല്‍ ഓഫീസില്‍ പോയി കത്തിയെടുത്ത് തിരികെയെത്തി കുട്ടികളെ ആക്രമിക്കുകയായിരുന്നു. എല്‍ബിന്റെ നെഞ്ചിനും വൈശാഖിന്റെ വയറിനും കുത്തേറ്റു. ഇരുവരെയും മല്ലപ്പള്ളി താലൂക്ക് ആശുപത്രിയില്‍ പ്രവേശിപ്പിച്ചു. സംഭവത്തിന് പിന്നാലെ പ്രതിയായ അഭിലാഷ് ഒളിവില്‍ പോയതായി കീഴ്വായ്പൂര്‍ പൊലീസ് പറഞ്ഞു.
വാർത്തകൾ വേഗത്തിൽ അറിയാനും, അറിയിക്കാനും ഈ ഗ്രൂപ്പിൽ JOIN ചെയ്യുക
