വരാപ്പുഴ സ്‌ഫോടന കേസ്; ഒരാള്‍ അറസ്റ്റില്‍, രണ്ട് പേര്‍ ഒളിവില്‍

കൊച്ചി: എറണാകുളം വരാപ്പുഴയില്‍ പടക്ക സംഭരണശാല പൊട്ടിത്തെറിച്ച്‌ സ്ഫോടനമുണ്ടായ സംഭവത്തില്‍ കസ്റ്റഡിയിലെടുത്ത ‍ജെയ്‌സന്റെ അറസ്റ്റ് പൊലീസ് രേഖപ്പെടുത്തി.

കേസിലെ മുഖ്യപ്രതി ജെന്‍സന്റെ സഹോദരനാണ് ‍ജെയ്‌സണ്‍. ഇയാള്‍ കേസിലെ മൂന്നാം പ്രതിയാണ്. അനധികൃത പടക്ക നിര്‍മാണശാലയിലെ മേല്‍നോട്ടക്കാരനായിരുന്നു ജെയ്‌സണ്‍. ഇയാള്‍ക്കെതിരെ ജാമ്യമില്ലാ വകുപ്പ് ചുമത്തിയാണ് കേസെടുത്തിരിക്കുന്നത്. മുഖ്യപ്രതി ജെന്‍സണും രണ്ടാം പ്രതി മത്തായിയും ഒളിവിലാണ്.

പടക്ക വില്‍പ്പനയ്ക്കുള്ള ലൈസന്‍സിന്റെ മറവില്‍ ഇവിടെ നടന്നത് പടക്ക നിര്‍മാണമാണെന്നാണ് വിവരം. ജെയ്‌സണ്‍ എന്നയാള്‍ക്ക് പടക്കം വില്‍പ്പനക്കുള്ള ലൈസന്‍സ് മാത്രമാണ് ഉള്ളത്. അതിന്‍്റെ മറവില്‍ അനധികൃതമായി വന്‍തോതില്‍ പടക്കം സൂക്ഷിക്കുകയായിരുന്നു. ബുധനാഴ്ച വൈകിട്ട് അഞ്ച് മണിയോടെയാണ് ആന്‍സണ്‍ എന്ന വ്യക്തിയുടെ ഉടമസ്ഥതയിലുള്ള പടക്കശാലയില്‍ സ്ഫോടനമുണ്ടായത്. ആന്‍സണിന്റെ സഹോദരന്‍ ഡേവിസ് (51) സ്ഫോടനത്തില്‍ കൊല്ലപ്പെട്ടു.

മൂന്ന് കൂട്ടികള്‍ ഉള്‍പ്പെടെ ഏഴുപേര്‍ പരിക്കേറ്റ് ആശുപത്രിയില്‍ ചികിത്സയിലാണ്. ആന്‍സണിന്റെ മകന്‍ ജെന്‍സണ്‍, തൊട്ടടുത്ത വീട്ടിലെ ഫ്രഡീന (30), മക്കളായ ഇസബെല്ല (8), എസ്തര്‍ (7), എല്‍സ (5), അയല്‍വാസി കെ ജെ മത്തായി (69), മകന്‍ അനീഷ് എന്നിവര്‍ക്കാണ് പരിക്കേറ്റത്. പൂര്‍ണമായും തകര്‍ന്ന പടക്കശാലയുടെ സമീപത്ത് ഒരു കിലോമീറ്റര്‍ ചുറ്റളവില്‍ വീടുകള്‍ക്കും നാശം സംഭവിച്ചു. ജനങ്ങള്‍ തിങ്ങിപ്പാര്‍ക്കുന്ന പ്രദേശത്തെ ഒറ്റനില വീട്ടിലാണ് പടക്കങ്ങള്‍ സൂക്ഷിച്ചിരുന്നത്. കെട്ടിടം സ്ഫോടനത്തില്‍ പൂര്‍ണമായും തകര്‍ന്നു.